सवा १ लाख घरधुरीलाई रोजगारी

जेष्ठ २१, २०७८ कान्तिपुर संवाददाता

लिङ्क ः https://bit.ly/2S0YrXT
 
जनकपुर — ग्रामीण उद्यम तथा विप्रेषण आयोजना (समृद्धि) ले १ लाख २५ हजार घरधुरीलाई लाभ पुग्ने गरी प्रदेश २ का ७ जिल्लामा आर्थिक एवं आयआर्जनका कार्यक्रम लागू गरेको छ ।
 
कृषि तथा गैरकृषि क्षेत्रमा आयआर्जनका लागि लघु, घरेलु तथा साना उद्यम प्रवर्धन गर्ने तथा ग्रामीण विपन्न, आप्रवासी र आप्रवासनबाट फिर्ता भएका लागि आयआर्जनको दिगो स्रोत प्रदान गर्न आयोजनाले यो कार्यक्रम ल्याएको हो । सन् २०२२ सम्म रोजगारीको प्रबन्ध मिलाउने कार्यक्रमको लक्ष्य छ ।

सरकार र कृषि विकासका लागि अन्तर्राष्ट्रिय कोषबीच सन् २०१५ को डिसेम्बरमा सम्झौता भई उद्योग, वाणिज्य तथा आपूर्ति मन्त्रालयअन्तर्गत ग्रामीण उद्यम तथा विप्रेषण आयोजना (समृद्धि) कार्यान्वयनमा आएको हो । प्रदेश २ का सप्तरी, सिरहा, धनुषा, महोत्तरी, सर्लाही, रौतहट र बारामा आयोजनाले काम थालेको छ ।

साझेदार संस्था समृद्धि हेल्वेटास प्रादेशिक कार्यालय जनकपुरका अनुसार ८० प्रतिशत लक्षित वर्ग गरिबीको रेखामुनिलाई समेटिएको र उनीहरूलाई उद्यम गर्न सक्षम पारिनेछ । जसमध्ये महिला, युवा र आप्रवासी घरपरिवार तथा वैदेशिक रोजगारबाट फर्केर आएका व्यक्ति रहनेछन् ।