"बढाउँदै छु व्यवसाय"
स्थानीय एक एफएम रेडियोले प्रशारण गरेको तालीम सम्वन्धी सूचनाले गर्दा अनामिकाको जीवनले फरक मोड लियो । खास के थियो त्यो सूचनामा जस्ले वेरोजगार अनामिकालाई उद्यमी नै बन्ने बाटो देखायो ।
कुरा बैशाख महिनाको हो । गाउँमै सहायक व्यूटिसियनको निःशुल्क तालिम खुलेको थियो । यो अवसर जुटाएको थियो ग्रामीण उद्यम तथा विप्रेषण (समृद्धि) आयोजनाको आर्थिक सहयोग र हेल्भेटास नेपालको प्राविधिक सहयोगमा स्थानीय एक तालिम तथा रोजगार सेवा प्रदायक संस्था उद्यम विकास परामर्श तथा तालिम केन्द्र प्रा.ली. कलैयाले ।
उनले गत १२ बैशाख देखि १४ साउन २०७६ सम्म कलैयामा सञ्चालन भएको ३९० घण्टा अवधिको सहायक व्यूटिसियन तालिम सफलतापूर्वक पुरा गरिन् र सीप परिक्षणमा सहभागि भइन् । यस विचमा उनीमा आफ्नै व्यवसाय गर्ने सोच बन्यो तर त्यसका लागि कसरी जुटाउने लगानी भन्ने चिन्ता पनि संगसंगै थियो । गत भदौ महिनामा सरसापट आदि गरेर जुटाइन रु ९,००० र त्यसबाटै शुरु गरिन् कलैया मै अमृता व्यूटिपार्लर व्यवसाय । यो सेवामूलक व्यवसाय भएकाले खासमा सीप र श्रम विक्रि गर्ने हो । यो उनको शुरुवाती अवस्था हो । अहिलेको कमाइबाट उनी सन्तुष्ट छिन् । यही कमाइले उनको आफ्नो खर्च धानेको छ र घर खर्चमा पनि भरथेग गर्न सकेकी छन् उनले । एन आइ सि एसिया बैकमा खाता खोली सानो तिनो बचत पनि शुरु गरेकी छिन् उनले । “तर यत्तिले मात्र कहाँ हुन्छ र बढाउँदैछु व्यवसाय” उनी खुलेर बताउछिन् । यति मात्र हैन उनलाई उच्च शिक्षा अध्ययन गर्ने भोक पनि जागेको छ । यसका लागि पार्लरबाट आएको आम्दानीले साथ दिनेमा उनी विस्वस्त छिन् ।
