व्यावसायिक पशुपालनमा आकर्षण
असार ५, २०७९कान्तिपुर संवाददाता
धनुषा — महोत्तरीको गौशाला नगरपालिका–१२ की सरिताकुमारी कक्षा–८ मै पढ्दा श्रवण महतोसँग वैवाहिक बन्धनमा बाँधिइन् । कलिलो उमेरमा विवाह, आर्थिक समस्या र पारस्परिक समझदारी अभावका कारण घर व्यवहारको विषयमा विवाद भइरहन्थ्यो । तर, गाईभैंसीपालन र दूध बेचेर दैनिक रूपमा आम्दानी गर्न थालेपछि उनीहरूको जीवनमा परिवर्तन आएको छ ।
अहिले उनीहरूलाई पशु फार्म सम्हाल्न भ्याइनभ्याइ छ । घर–व्यवहार सञ्चालन, छोरा–छोरीको पठनपाठन र औषधि उपचारका लागि अब पहिलेजस्तो आर्थिक समस्या छैन । साना किसान कृषि सहकारी संस्थाको सदस्य भएर मासिक एकसय रुपैयाँ बचत गर्न थालेकी सरिताले समृद्धि आयोजनाबाट तालिम लिएर २०७८ सालदेखि पशुपालन व्यवसाय सुरु गरिन् । यसले उनको घरमा आर्थिक अवस्था सुधार हुनुको साथै समाजमा अगुवा किसानको सम्मान पाएकी छिन् । पशु फार्म दर्ता गर्नुअघि एउटा भैसीको दुध बेच्दा दैनिक डेढसय रुपैयाँ आम्दानी गर्ने सरिता अहिले ५ गाई र १ भैसीको दुध बेचेर दैनिक ३ हजारसम्म आम्दानी गर्छिन् ।
यहाँका किसानहरू समूहमा संगठित भई व्यावसायिक पशुपालनमा लागेका हुन् । सामूहिकरुपमै दुध संकलन र बिक्रीका लागि डेरीको स्थापना भएको छ । डेरी नहुँदा किसानले उत्पादन गरेको दुध बिक्री नहुने र बिक्री हुँदा पनि उचित मूल्य नपाउने समस्या थियो । डेरीका कारण किसान उत्साहित भएको कान्तिबजार दुग्ध उत्पादक कृषक समुहका अध्यक्ष रामशोभित सिंह कुशवाहाले बताए । ग्रामीण उद्यम तथा विप्रेषण आयोजना (समृद्धि) आयोजनाअन्तर्गत गौशाला–१२ मा किसानलाई सहुलियत कर्जा र डेरी सञ्चालनका लागि उपकरण खरिदमा सहयोग गरिएको छ ।
