वित्तिय शिक्षा तथा व्यावसायिक ज्ञान तालिमको प्रभावका कारण व्यावसाय प्रवर्द्धन भयो

खानिभञ्ज्याङ -३, दियाले निवासी ज्ञान बहादुर बि. क. को आर्थिक अवस्था निकै कमजोर थियो । आम्दानीको श्रोत सिमित भएको हुनाले उनीलाई ८ जनाको परिवार पाल्न र छोरा छोरी पढाउन गाह्रो भइरहेको थियो । साहुसँग ऋण काडेर विदेश (कतार) गएका ज्ञान बहादुर विदेशमा भने जस्तो कमाई नभए पछी घर नै फर्केर आउनु पर्यो । साहु सँग लिएको ऋण सय कडा तीनले ब्याज तिर्नु पर्ने कारण ज्ञान बहादुर वि. क. को आर्थिक अवस्था झन् बिग्रन गयो । आम्दानिको श्रोतका लागि अन्य कुनै बिकल्प भएन ।

समय बित्दै गयो─ ग्रामीण उद्यम तथा विप्रेषण आयोजना (समृद्धि)संग सहकार्य सम्झौता भएको श्री नमुमा कृषि सहकारी संस्थाको सदस्य बने ज्ञान बहादुर । सहकारी संस्थामा आवद्ध सदस्यहरूको क्षमता अभिवृद्धि गर्ने कार्यक्रम अन्तर्गत समृद्धि आयोजनाले वित्तिय शिक्षा तथा व्यावसायिक ज्ञान तालिम दियो । ज्ञान बहादुरले ३ दिने तालिममा सहभागि हुने अवसर पाए । तालिमको दौरान उनले─वित्तीय शिक्षाको परिचय र महत्व; पैसा र जीवन; पैसाको स्रोत तथा उपयोग; आम्दानी सन्तुलन; सपनाको संसार; सपनाको यात्रा; वित्तीय लक्ष्य निर्धारण; बचत; ऋण; व्यावसायिकता; व्यवसाय दर्ता; सरल व्यावसायिक योजना जस्ता वहु-आयामिक विषय वस्तुमा जानकार हुने सुवर्ण अवसर पाएको महशुस गरे । तीन दिने छोटो अवधिको तालिममा सिकेका जिवन उपयोगि विषय वस्तुले उनलाई कसरी व्यावसायको थालनी गरौं भन्ने कुरा सोच्न वाध्य वनायो । शुरुवात  ─ बंगुर पालनबाट गर्ने इच्छा जाग्यो ।

तर लगानीका लागि स्रोतको अभाबको कारण सो कार्य गर्न निकै गार्हो हुने देखियो । त्यसपछि उनले आँफू पनि सदस्य रहेको सहकारीबाट ऋण लिने विचार गरे । लगानीको सहि सदुपयोग गरी व्यावसाय गर्न जानेमा आर्थिक अवस्था सुधार हुन सक्दछ, गरिब भएर वस्नु पर्दैन भनि तालिममा सिकेको ज्ञानलाई व्यवहारमा उतार्न उनी तत्पर भए । नमुना कृषि सहकारी संस्था─ ओखलढुङ्गाबाट वंगुरपालन गर्नको लागि ४० हजार रुपैंया ऋण लिए र बंगुर पालन सुरु गरे । बंगुर पालनबाट विस्तारै आम्दानी हुन थाल्यो ।

ज्ञान वहादुरलाई अब परिवारको खर्च टार्न र साहुहरूको ऋण फिर्ता गर्न सजिलो हुँदै गयो । वंगुरको आम्दानीबाट सहकारीको ऋण फिर्ता गरे । थप रु३० हजार ऋण लिएर व्यावसायिक रुपमा वंगुर पालन  गर्नका लागि ज्ञान वहादुरले बंगुर फर्म पनि दर्ता गराई सकेका छन् । खोर निर्माणका लागि राष्ट्रिय वाणिज्य बैंकबाट ऋण लिएर आधुनिक तरिकाको खोर तयार गरेका छन् । उनको खोरमा पाठा पाठी उत्पादन गर्ने ५ वटा माउ र १ वटा भाले बंगुर छ । उनी अहिले व्यावसायिक भएका छन्। ज्ञान वहादुरको बंगुर पालन व्यावसाय फस्टाउँदो छ । आम्दानी बढ्न थालको छ । उनले अहिले ─ एक पटकमा एउटा वंगुरले जन्माएको पाठा पाठीबाट ४० देखी ५० हजार सम्म आम्दानी गर्दछन् ।